Ang kalisud sa pagpanarbaho sa gawas sa nasud.

Sa atong pagpanarbaho sa lugar nga layo kaau sa atong pamilya, dili lalim ang kaagi ug pag-antos arun lang nga mahatag nato kanila ang mga butang ug panginahanglanon nila, nga atong gituhoan nga maoy angay lamang nila nga pagatagamtamon.

Sa kalisud sa kinabuhi ug panginabuhi karun sa atong pinanggang nasud, ang mga ultimong mamomo-u sa atong katilingban musugal sa pagpanarbaho sa gawas, taliwala sa dili tiaw nga pag-antos ug mga kaagi sa pagpanarbaho sa lugar nga dili ato. Ang kamingaw nga maoy kasagara nga nagpahuyang sa atong mga kaigsoonan nga nag.antos sa tukmang pagbati niini. Usahay samtang naa ka sa sook naghinuktok, dili nimu mabantayan nga mukalit lang ug tulo ang imong mga luha. Sa matag gabie sa imong dayung pagtulog, dili malikayan nga maghuna-huna ka sa imong pamilya nga imong gisaaran nga uli-on nimu pag-abot sa panahon sa bakasyon. Ang kapait niini, dunay mga ubay-ubay sa atong mga igsoong nanarbaho sa layong dapit nga mga nakasinati sa kasakit sa gitawag ug "Long Distance Relationship" nga niresulta sa panabulag nila sa ilang kapikas sa kinabuhi. Sakit huna-hunaon nga dili masabtan sa atong mga kabahin ang pag-antos nato.

Sa tinood lang, ang kasagaran nga huna-huna sa mga silingan, kaila, amigo, parente; ug usahay mismong asawa o bana ug mga anak, lami ug hayahay ang gitagamtam nato diri sa atong pagpanarbaho, apan ang kamatouran nga sakit huna-hunaon, dili tiaw ang kaagi sa matag adlaw. Una niini, walay mupukaw kanimo, walay muandam sa imong gamit, walay muluto sa imong pagkaon, ug maski sa pagplantsa sa imong sinena, ngadto sa paglaba, dili lang ka trabahante kundi nahulog ka pa ug katabang sa imong kaugalingon. Ahahahaha. Kataw-anan sa atong pandungog apan sakit sa atong pagbati.

Parte sa pagkaon, gatoo usab ang uban nga lami kaau among ginakaon, nga manok permi, hotdog permi, karne permi, apan kung sa bisan asang kwarto sa OFW ka musulod, dli mawala sa lamesa ang tinapa, noodles, pan, ug ginamos o uyap, arun lang maka-tigum ug dyutayng kwarta ug maigo ang pila lamang ka parte sa nabilin sa sweldo nga gipadala sa atong pamilya. Timan-an nato nga ang OFW dili banko kundi trabahante rapud nga angayan nato hatagan ug bili ang kada piso nga kinitaan nila diha sa kada singot nga midagayday diha sa ilang pagpaningkamot.

Sa trabaho usab, kinahanglan ang imong taas nga pasensya diha sa imong agalon ug isig ka trabahante, samot na ug gikan sa laing nasud, dili malikayan ang "communication barrier" ug nagkalian-laing batasan. Dunay mga oportunista, tapulan, ug mga maabubhoon nga mandaot nimu. Apan tanan kini madala ra sa pahiyom ug pagpaubos. Usahay, duna pay mga gipangmaltrato sa employer, ug ang uban dili ginahatagan sa hustong sweldo nga gisabutan diha adeser sa paglarga.

Sa panahon nga mubakasyon ka, usahay mabati nimu diha sa imong pamilya nga mura ug dili ikaw ang ilang gipaabot kundi ang imong dala nga pasalubong. Dunay mga panahon nga mas bililhon pa ang mga butang nga imong dala kaysa sa mismong ikaw nga naningkamot para kanila. Apan mawala ra ang imong kahiubos kung madungog nimu ang tam-is nga "salamat" gikan kanila. Pero sige lang, gibuhat bitaw nato ni para sa ilaha, ang importante lang nga makita nato nga nalipay sila sa atong pag-uli.

Pipila lamang kini sa mga nangahitabo ug gipangbati sa mga OFW . Wala nako ni gisulat nga blog arun malooy mo sa si kinsa sa inyong pamilya nga naa sa gawas sa nasud, kundi arun mahimata kita sa pag-antos nga ilang giagian para sa inyo. Gamay'ng butang ra ang pasalamat, apan dako kaau ug katabang arun mulagsik ang kasing-kasing sa usa ka OFW. Karun lang nako nasabtan kung nganung gitawag nila ang "OFW ang bagong bayani", tungod diay kini sa mga kaagi ug mga pag.antos nga gisagubang sa matag usa ka trabahante nga naa sa gawas sa atong nasud.

Ang paghatag ug bili sa kada luha nga mitulo tungod sa kamingaw ug sa kada singot nga midagayday sa ilang pagpaningkamot, sangko sa langit na ang kalipay nila ana. Maski usa lang ka tawag o chat sa facebook nga pagpangumusta, mka-awhag na kana nila arun mas magkugi pa para sa inyo. Hinaot nga samtang naa moy panahon, maistorya ninyo ang pagpasalamat ug maipadayag ninyo sa ila sa inyong gugma.

Salamat sa paghatag ug oras sa inyong pagbasa.

Click here to earn money easily